०८ बैशाख २०८२, सोमबार
21-04-2025 , Mon
×

बीपीका का.मु. उपकुलपतिको नियुक्तिबारे प्रमाण पेश गर्न आदेश

Logo
नमो संवाददाता प्रकाशित बिहिबार, माघ १८, २०८०

तस्विर : नमो अनलाईन

धरान । उच्च अदालत विराटनगरले बीपी कोइराला स्वास्थ्य विज्ञान प्रतिष्ठान धरानका कायममुकायम उपकुलपति प्रा.डा.प्रल्हाद कार्कीको नियुक्ति खारेज गर्नु नपर्ने आधार र कारणसहित प्रमाण पेश गर्न आदेश दिएको छ ।

कामु उपकुलपतिको नियुक्ति गैरकानूनी रूपमा भएको दाबीसहित खारेज गर्न माग गर्दै परेको रिट निवेदनको सुनुवाइ गर्दै उच्च अदालत विराटनगरकी न्यायाधीश ममता खनालको एकल इजलासले मङ्गलबार त्यस्तो आदेश जारी गरेको हो ।

धरानका सुमन श्रेष्ठले प्रतिष्ठानका कुलपति तथा प्रधानमन्त्री, सह–कुलपति  तथा स्वास्थ्य तथा जनसङ्ख्या मन्त्री र प्रतिष्ठानका कामु उपकुलपति कार्कीलाई विपक्षी बनाएर उत्प्रेषण परमादेश जारी गर्न माग गरेर रिट निवेदन दिएका थिए । रिटमा कामु उपकुलपतिको नियुक्ति गैरकानूनी रहेकाले खारेज गरी वर्तमान समस्याको समाधान गर्न माग गरिएको थियो । त्यस्तै विगतका अध्ययन प्रतिवेदन कार्यान्वयन गर्न माग गरी प्रतिष्ठानमा आउने पदाधिकारी राजनीतिक नियुक्ति नभई दक्षता र क्षमताका आधारमा प्रतिस्पर्धाबाट नियुक्त गर्न माग गरिएको थियो ।

सो निवेदनमाथि सुनुवाइ गर्दै उच्च अदालतले बाटोको म्यादबाहेक १५ दिनभित्र निवेदकको माग बमोजिम आदेश जारी हुनु नपर्ने आधार र कारणसहितको जवाफ पेश गर्न आदेश दिएको हो । त्यसका लागि प्रधानमन्त्री र स्वास्थ्य मन्त्रीले उच्च सरकारी वकिल कार्यालय विराटनगरमार्फत् र कामु उपकुलपति कार्कीले आफै वा आफ्नो कानून बमोजिमको प्रतिनिधिमार्फत् लिखित जवाफ पेश गर्न आदेश दिइएको छ । साथै निवेदकले माग गरेको अन्तरिम आदेशका विषयमा छलफल गर्न दुवै पक्षलाई माघ १९ गते बोलाइएको छ ।

बुधबार उच्च अदालत विराटनगरमा निवेदकका तर्फबाट अधिवक्ताहरू देवेन्द्र कोइराला, विवेक तिम्सिना र तीर्थराज भट्टराईले बहस गरेका थिए । सरकारले कार्कीलाई २०८० असार १७ को कामु उपकुलपतिमा नियुक्त गरेको थियो । मङ्सिर ४ मा उमेरहदका कारण उनको पदावधि सकिए पनि पुनः सोही पदमा निरन्तरता दिँदै आएका छन् । उनको नियुक्ति प्रतिष्ठानको ऐन र नियमावली विपरीत रहेको रिटमा दाबी गरिएको छ । विभिन्न विवादका कारण प्रतिष्ठान लामो समयदेखि अस्तव्यस्त बनिरहेको छ ।

कालोमोसो दल्ने प्रयासको विरोध
बीपी कोइराला स्वास्थ्य विज्ञान प्रतिष्ठानका कायममुकायम उपकुलपति प्रा.डा.प्रह्लाद कार्कीमाथि कालोमोसो दल्ने प्रयास भएको घटनाप्रति विभिन्न क्षेत्रबाट खेद प्रकट भएको छ ।

मङ्गलबार कामु उपकुलपति कार्कीमाथि भएको उक्त घटनाको आन्दोलनरत शिक्षक, कर्मचारी संयुक्त सङ्घर्ष समितिले विज्ञप्ति जारी गरेर खेद प्रकट गरेको छ ।

शिक्षक कल्याण समाजका अध्यक्ष डा.सेराज अहमद खान र कर्मचारी कल्याण समाजकी अध्यक्ष कविता ढकालले संयुक्त विज्ञप्ति जारी गर्दै उक्त घटनाप्रति खेद प्रकट गरेका हुन् ।

आफूहरूले भद्र अवज्ञा मात्र गरिरहेको जनाउँदै कालोमोसो दल्नेजस्तो अभद्र व्यवहार जो सुकैबाट भए पनि सङ्घर्ष समितिको पूर्ण असहमति रहेको विज्ञप्तिमा उल्लेख गरिएको छ । समितिले प्रतिष्ठानजस्तो प्राज्ञिक थलोमा यस्ता अबाञ्छित गतिविधि नगर्न नगराउन पनि आग्रह गरेको छ ।

त्यसैगरी बीपी अध्ययन प्रतिष्ठान सुनसरीले पनि विज्ञप्ति जारी गरेर घटनामा संलग्नलाई कारबाहीको माग गरेको छ । प्रतिष्ठानका अध्यक्ष विकास आचार्यले विज्ञप्ति जारी गर्दै विधि र प्रक्रिया मिचेर यस्तो अराजक गतिविधि गर्ने राजनीतिक सङ्गठन हुन नसक्ने उल्लेख जनाएका छन् ।

त्यस्तै नेपाली काङ्ग्रेस धरान नगर समितिले पनि विज्ञप्ति जारी गरेर घटनाको विरोध गरेको छ । काङ्ग्रेसका नगर सभापति श्याम पोखरेल, प्रदेश १ (२) कार्यसमिति सभापति मुरारी भट्टराई, प्रदेश १ (१) सभापति अनिल श्रेष्ठ र प्रतिनिधिसभा क्षेत्रीय कार्यसमिति सभापति सुजेन्द्र तामाङले संयुक्त वक्तव्य जारी गर्दै घट्नाको निन्दा गरेका छन् । मङ्गलबार मोहन वैद्य नेतृत्वको क्रान्तिकारी कम्युनिष्ट पार्टीका कार्यकर्ताले काम उपकुलपति कार्कीलाई कालोमोसो दल्ने प्रयास गरेका थिए । उनीहरूलाई प्रहरीले पक्राउ गरेको छ ।

कमेन्ट गर्नुहोस्
सम्बन्धित

देवानगञ्ज। कोशी प्रदेश स्थित सुनसरीको देवानगञ्जमा युवाहरुलाई रोजगारीमुखी बनाउने लक्ष्यका साथ इलेक्ट्रिकल सीप विकास तालिम सुरु भएको छ। देवानगञ्ज गाउँपालिकाको आर्थिक सहयोगमा जय नेपाल होटल म्यानेजमेन्ट एण्ड टेक्नोलोजी ट्रेनिङ्ग प्रालिको प्राविधिक सहयोगमा सञ्चालित प्रधानमन्त्री रोजगार कार्यक्रम अन्तर्गत कार्यस्थलमा आधारित इलेक्ट्रिकल सीप विकास तालिमको सुरुवात एक विशेष समारोहबीच उद्घाटन गरी सरु गरिएको हो। उद्घाटन समारोहमा देवानगञ्ज […]

काठमाडौं । हिन्दू समाजको धार्मिक शोभायात्रामा अवरोधका घटना बढेका छन् । ३० चैत्रमा वीरगञ्जमा हनुमान जयन्तीका बेलामा भएको अवरोधले स्थिति असामान्य नै बन्यो । छपकैया पुगेपछि मदरसाबाट ढुंगा प्रहार भयो । यसलाई इस्लामिक संघ नेपालले पनि स्वीकारिसकेको छ । शोभायात्रा जहाँ स्थगित भएको हो त्यहींबाट पुनः सुचारु हुनुपर्ने हिन्दू राष्ट्र जागरण अभियानको माग रहेको छ […]

सुनसरी । देवानगञ्ज गाउँपालिकाले “खुसी किसान, देवानगञ्जको पहिचान” भन्ने नारा सहित भूमिहीन दलित तथा भूमिहीन सुकुम्बासीहरूलाई लक्षित गरी निःशुल्क जग्गाधनी प्रमाण–पुर्जा वितरण कार्यक्रम सम्पन्न गरेको छ। नेपालमा दोस्रो र कोशी प्रदेशमा पहिलो पटक स्थानीय तहको रूपमा देवानगञ्ज गाउँपालिकाले वडा नं. ३ का छ जना भूमिहीन सुकुम्बासीहरुलाई निःशुल्क जग्गाधनी प्रमाण–पुर्जा वितरण गर्दै कार्यक्रम सम्पन्न गरेको हो। […]